Bericht vom Schlussturnen 2009

Am 5. September hätt z Basadinge üses alljöhrliche Schlussturne statt gfunde. Am halbi 2 händ sich alli vo Gross bis Chli bim Schuelhuus Basadinge versammlet gha…
Noch em  Schwänzlifangis sind Gruppene bildet worde und es isch mit Stafettene bereits in Gruppewettkampf gstartet worde. Wer findet am schnellste öppis oranges, wieviel Velo stönd im Veloständer usw. Mit grosser Freud sind alli debii gsi und di einte sind jetzt scho recht is schwitze cho..
I dä Gruppene isch jewiils öper vom TV, öpper vo de Damenriege, je Buebe vo de chline und grosse Jugi und je Meitli vo de chline und gross Meitliriege gsi. I dänä Gruppe sinds dänn vo Poste zu Poste…
Sie händ bim Wiitsprung usem Stand möglichst wiit müesse gumpe, bim Sprint möglichst allne möse dävoorenne, de Schleuderball so wiit wie möglich schleudere, wa sich als gar nid so eifach usegstellt hätt, plötzlich landet de Schleuderball ufem Pauseplatz statt uf de Wiese….
Me hett allne agseh wieviel Freud und Spass dases gmacht hätt. Die lachende Gsichter sind immer wieder toll zum aluege. Noch dänä Pöste mit Schwergwicht Liechtathletik hätts nomol Stafette gäh, das mol mit Sackgumpe und Garette-Wettrenne. Während dem dass d Noteblätter usgwertet worde sind, händ sich di grossse Girls uf ihri Vorfüehrig vorbereitet. Sie händ anschlüssend ihri Wettkampfgymnastik i de Halle vorgführt. Wow, vor so viel Lüüt händses no nie zeiget. Super, händer da gmacht, grosses Kompliment…..
Mit dä langersehnte  Rangrkündigung händ mir dä super Nomittag usklinge loh. „Juhuii mir händ gunne!“ und vieles meh hämmer denn ghört. Ich glaube da isch wieder mol en glungne Alass gsi für alli.
Schön das au so viel Eltere und Fans cho sind go luege und das üsi chli Festwirtschaft so rege gnutzt worde isch.
Merci viel mol…
Au e grosses Danke de Corinne fürs organisiere und de Nicole fürs usführe. Danke au allne fliessige Kuchelieferante und Helfer.
Und zum Schluss Danke allne wo mitgmacht händ denn nu so cha da Schlussturne so lässig werde…

Michèle Frei

>>> Fotos